Urtebete pasatxoko lanaren eta ikerketaren ondoren, 2024. urte hasiera honetan sortu da Mamuka. Elirale-Pantxika Telleria Konpainiaren sorkuntza errepertorio zabalari gehitzen zaion azken ttipia da. Batez ere ikusle gazteei zuzenduta, 3 urtetik goiti, sorpresa atsegina izan dugu ohartzean oihaneko unibertsoak eta bertako biztanle txiki-txikiek publiko helduari ere oihartzun egiten ziotela.
Tonu ludikoan, dantza proposamen honek naturaren hauskortasunaz sentsibilizatzen du, eta klima desarautze nabariaren ondorioez ohartarazten gaitu. Pantxika Telleria artistak emeki-emeki eta koloretan helarazten jakin duen mezua, aldi berean haur hezkuntzako ikasleengana eta dantzan adituagoa den publikoarengana. ZIC des Arts-ak berrmoldatu dituen Vivaldi-ren Lau Urtaroen doinuan, dantza-bikotearen jokoak bezala, lanak norabide susmagarri baterantz bidaiarazten gaitu.
Soustons-eko Marensine-n eta Miarritzeko Gare du Midi-n egonaldiak egin ondoren, Malandain Ballet Biarritz-en laguntzarekin, gure estreinaldia etxe betearen aurrean aurkezteko ohorea izan genuen Senpereko Larreko kulturgunean otsailaren erdialdean. Mamuka poetikoaren arrakasta ere ez zen ukatu Hendaiako Mendi Zolan aretoan hurrengo astean.
Duela gutxi, Iruñeko eta Amorebieta-Etxanoko ikusleek ere gure azken sorkuntzaren freskotasuna gozatu zuten, batez ere kontuan harturik aretoetan zeuden gazteenak aurretik sentsibilizatuak izan zirela koreografia lanaz, dantzari gazteek beraiek eta koreografoak emandako tailerren bitartez.
Hitzordua ematen dizuegu ikasturte hasieran Euskal Herriko emanaldien bira baterako, Euskal Herri Elkargoak koordinatuta.
